പട്ടിക വിഭാഗ സങ്കേതങ്ങളുടെ പേര് മാത്രം മാറിയാൽ പോരാ, അവസ്ഥ കൂടി മാറണമെന്ന് കെ.പി.എം.എസ് സംസ്ഥാന സെക്രട്ടറി പുന്നല ശ്രികുമാർ. കെ പി എം എസ് കോട്ടയം ജില്ലാ നേതൃയോഗം വൈക്കം സത്യാഗ്രഹ സ്മാരക ഹാളിൽ ഉദ്ഘാടനം ചെയ്തു സംസാരിക്കുകയായിരുന്നു അദ്ദേഹം.
ഭവന നിർമ്മാണ പദ്ധതി പൂർണ്ണമായി ലൈഫിലേക്ക് മാറ്റിയത് വഴി ഗുണഭോക്തൃ സംഭാവന കൂടി വിനിയോഗിച്ച് വലിപ്പവും സൗകര്യങ്ങളും കൂട്ടാൻ കഴിയാതെയായി. നിലവിൽ ആവിഷ്കരിച്ച് നടപ്പിലാക്കുന്ന ഫ്ലാറ്റ് സമ്പ്രദായത്തിൽ വിനോദത്തിനും വിജ്ഞാനത്തിനും ആരോഗ്യ പരിപാലനത്തിനും ഉപകരിക്കുന്ന അനുബന്ധ സൗകര്യങ്ങൾ കൂടി ഉണ്ടാവണമെന്നും പട്ടിക വിഭാഗ സങ്കേതങ്ങളുടെ കാലോചിതമായ പരിഷ്കരണം ഉറപ്പുവരുത്താതെ അരക്ഷിത കേന്ദ്രങ്ങൾക്ക് ആലങ്കാരിക നാമം നൽകുന്നതുകൊണ്ട് കാര്യമില്ലെന്നും അദ്ദേഹം പറഞ്ഞു.
