കോട്ടയം : കേരളത്തിലെ മുപ്പത് ലക്ഷത്തോളം വരുന്ന ദളിത് ക്രൈസ്തവർക്ക് പ്രത്യേക സംവരണം പ്രഖ്യാപിക്കാത്തപക്ഷം വോട്ടുകൊണ്ട് മറുപടിയെന്ന് ചേരമസാംബവ ഡെവലപ്പ്മെന്റ് സൊസൈറ്റി (സി എസ് ഡി എസ് ) സംസ്‌ഥാന പ്രസിഡന്റ്‌ കെ കെ സുരേഷ്. സാമൂഹികമായും സാമ്പത്തികമായും പ്രതിനിധ്യം ഇല്ലാത്ത ഈ വിഭാഗത്തെ കഴിഞ്ഞ ഏഴ് വർഷമായി പിണറായി സർക്കാർ അവഗണിക്കുകയാണ്. പട്ടിക വിഭാഗത്തിൽ ക്രിമിലയറും ഉപസംവരണവും നടപ്പിലാക്കുവാനുള്ള സുപ്രീം കോടതി വിധിയ്ക്ക് എതിരെ കേന്ദ്രം നിയമം പാസാക്കണമെന്നും വിധി സംസ്‌ഥാന സർക്കാർ നടപ്പിലാക്കരുത് എന്ന് ആവശ്യപ്പെട്ടും ദളിത് ആദിവാസി സംയുക്ത സമിതി ഡിസംബർ 10 ന് തിരുവനന്തപുരത്ത് നടക്കുന്ന പ്രതിഷേധ സാഗരം പരിപാടി ചരിത്ര വിജയമാക്കുമെന്നും കെ കെ സുരേഷ് പറഞ്ഞു. സി എസ് ഡി എസ് സംസ്‌ഥാന കമ്മിറ്റി പതിനായിരം പ്രവർത്തകരെ പങ്കെടുപ്പിക്കും.
സി എസ് ഡി എസ് സംസ്‌ഥാന നേതൃത്വ ക്യാമ്പ് കോട്ടയം പി ഡബ്ല്യൂ ഡി റസ്റ്റ് ഹൗസ് ഹാളിൽ ഉദ്ഘാടനം ചെയ്ത് സംസാരിക്കുകയായിരുന്നു അദ്ദേഹം.
ദളിത് ക്രൈസ്തവർക്ക് പ്രത്യേക സംവരണം നടപ്പിലാക്കുക, പട്ടിക വിഭാഗം ഉപസംവരണം ഏർപ്പെടുത്തുവാനുള്ള വിധിയ്ക്ക് എതിരെ കേന്ദ്രം നിയമനിർമ്മാണം നടത്തുക, ജാതി സെൻസസ് നടപ്പിലാക്കുക തുടങ്ങിയ ആവശ്യങ്ങൾ ക്യാമ്പ് പ്രമേയത്തിലൂടെ ആവശ്യപ്പെട്ടു.
*_സംസ്‌ഥാന സർക്കാരിനെതിരെ രൂക്ഷ വിമർശനം_*
സാമൂഹിക നീതി നടപ്പിലാക്കുന്നതിൽ സംസ്‌ഥാന സർക്കാർ പൂർണ്ണ പരാജയമാണെന്ന് ക്യാമ്പിൽ വിമർശനമുയർന്നു. തമിഴ്നാട്, ആന്ധ്രാ, ബീഹാർ തുടങ്ങിയ സംസ്‌ഥാനങ്ങൾ ജാതി സെൻസസ് നടത്തുമ്പോൾ സംസ്‌ഥാന സർക്കാർ ഒളിച്ചുകളി തുടരുകയാണ്. ദളിത് ക്രൈസ്തവരെയും പരിവർത്തിത ക്രൈസ്തവ കോർപ്പറേഷനെയും സർക്കാർ പൂർണ്ണമായും അവഗണിച്ചു. സാമ്പത്തിക സംവരണം നടപ്പിലാക്കിയ സംസ്‌ഥാന സർക്കാർ താൽക്കാലിക നിയമനങ്ങളിലൂടെയും ഒഴിവുകൾ റിപ്പോർട്ട് ചെയ്യാതെയും പട്ടിക വിഭാഗം സംവരണത്തിൽ വെള്ളം ചേർക്കുകയാണ്.
വിലക്കയറ്റം, സ്വജനപക്ഷപാതം, തൊഴിൽ ക്ഷാമം, ആരോഗ്യ മേഖലയിലെ പ്രശ്നങ്ങൾ തുടങ്ങിയ വിഷയങ്ങളിൽ സർക്കാരിനെതിരെ യോഗത്തിൽ വിമർശനമുയർന്നു.
അധ്യാപകനും ചരിത്ര പണ്ഡിതനുമായ ഡോ ടി എസ് ശ്യാംകുമാർ പഠനക്ലാസ് നയിച്ചു.
സി എസ് ഡി എസ് സംസ്‌ഥാന വൈസ് പ്രസിഡന്റ്‌ വി പി തങ്കപ്പൻ അധ്യക്ഷത വഹിച്ചു. സംസ്‌ഥാന ജനറൽ സെക്രട്ടറി സുനിൽ കെ തങ്കപ്പൻ, ട്രഷറർ പ്രവീൺ ജെയിംസ്, സെക്രട്ടറിമാരായ ലീലാമ്മ ബെന്നി, വിനു ബേബി, എം സി ചന്ദ്രബോസ് തുടങ്ങിയവർ പ്രസംഗിച്ചു.
