അമ്പനാട് : തോട്ടം തൊഴിലാളികൾക്ക് ആവേശമുണർത്തി കൊളുന്ത് നുള്ളൽ മത്സരം. സിപിഐ എം സംസ്ഥാന സമ്മേളനത്തിനു മുന്നോടിയായി കൊല്ലം ജില്ലയിലെ ഏക തേയിലത്തോട്ടമായ അമ്പനാട് എസ്റ്റേറ്റിലാണ് സി ഐ ടി യു ജില്ലാ കമ്മിറ്റിയുടെ നേതൃത്വത്തിൽ കൊളുന്ത് നുള്ളൽ മത്സരം സംഘടിപ്പിച്ചത്. സംസ്ഥാന സമ്മേളന സംഘാടക സമിതി ജനറൽ കൺവീനറും സി പി ഐ എം ജില്ലാ സെക്രട്ടറിയുമായ എസ്. സുദേവൻ മത്സരം ഉദ്ഘാടനം ചെയ്തു.
10 മിനിറ്റ് കൊണ്ട് ഏറ്റവും കൂടുതൽ കൊളുന്തു നുള്ളുകയായിരുന്ന നൽകിയ ലക്ഷ്യം. സംഘഗാനം പോലെ ഷിയർ മെഷീൻ്റെ താളം മുഴങ്ങി. 10 മിനിറ്റു കൊണ്ട് പരമാവധി കൊളുന്ത് നുള്ളി തൊഴിലാളികൾ താഴേക്ക്. ബ്രോണി (6 കിലോഗ്രാം) ഒന്നാം സ്ഥാനവും ജപമണി, ഗിരിജ (5 കിലോഗ്രാം) എന്നിവർ രണ്ടാം സ്ഥാനവും രാമലക്ഷ്മി (4.5 കിലോഗ്രാം) മൂന്നാം സ്ഥാനവും നേടി. ജേതാക്കൾക്കുള്ള സമ്മാനത്തുകയും മത്സരത്തിൽ പങ്കെടുത്ത മറ്റെല്ലാ തൊഴിലാളികൾക്കുമുള്ള ക്യാഷ് അവാർഡുകളും സംഘാടക സമിതി ജനറൽ കൺവീനർ എസ്. സുദേവൻ വിതരണം ചെയ്തു.
ബ്ലോക്ക് പഞ്ചായത്തംഗം ലേഖ ഗോപാലകൃഷ്ണൻ അധ്യക്ഷത വഹിച്ചു. സി ഐ ടി യു ജില്ലാ സെക്രട്ടറി എസ്. ജയമോഹൻ, പി.സജി, എസ് ബിജു,എം.എ. രാജഗോപാൽ, എ.ആർ. കുഞ്ഞുമോൻ, വി.എസ്. മണി, പി. രാജു എന്നിവർ സംബന്ധിച്ചു.
